Shebeshxt u ḓo fhedza hoḽodeyi o valelwa dzhele

Muimbi wa Lekompo ane a dzula Limpopo Shebeshxt o ṱangana na vhuleme vhuhulwane ha mulayo nga murahu ha musi khothe ya madzhisiṱaraṱa ya Polokwane yo hana khumbelo yawe ya beili, zwine zwa ita uri a dzule dzhele nga tshifhinga tsha dzhiholideyi.

Muimbi ane dzina ḽawe ḽa vhukuma ḽa vha Lehlogonolo Katlego Chauke, o ḓivhonadza khothe nga Ḽavhuraru, ḽa 17 Nyendavhusiku 2025,

U thetshelesa mvelelo dza khumbelo yawe ya beili nga murahu ha musi o farwa nga ṅwedzi wa Ḽara nga ṅwambo wa tshiwo tsha u sinyuwa badani tshi tshimbilelanaho na milandu ya u lingedza u vhulaha.

Nga murahu ha maḓuvha a u ṱaṱisana nga vhaimeleli na muvhuso, madzhisiṱaraṱa o dzhia tsheo ya u sa mu ṋea beili.

Nga ṅwambo wa zwenezwo, muimbi wa Ambuḽentsi u ḓo dzula o valelwa u swika a tshi ḓivhonadza khothe nga nwedzi wa Luhuhi 2026.

Zwifanyiso zwa Shebeshxt khothe zwo ṱavhanya u dzhena kha nyanḓadzamafhungo, musi munwe mushumisi wa inthanethe a tshi khou kovhelana video ya tshifhinga tshe tsheo ya ṋekedzwa ngatsho.

Poswo iyi yo vusa phindulo nnzhi u bva kha vhafuni na vhasasaladzi, vhanzhi vho sumbedza u tshuwa na u dinalea uri muimbi u ḓo vha a tshi khou fhedza Khirisimusi na Ṅwaha Muswa o valelwa.

Naho vhaṅwe vhashumisi vha Social Media vha tshi pfela vhuṱungu mutsila na muṱa wawe, vhaṅwe vho amba uri tsheo ya khothe yo vha yo tea musi ri tshi sedza vhuhulwane ha milandu ine a khou sedzana nayo.

• VHALANI HAFHU: Yolanda Mukondeleli o ḓivhadza uri zwino ndi DJ

Khaṱhulo yo dovha ya vhea Shebeshxt vhukati ha nyambedzano dza tshitshavha, na thaidzo dzawe dza mulayo dzi tshi khou bvela phanḓa na u thivhela mushumo wawe wa muzika.